Rohani-mefil

سالانہ روحانی محافل

سالانہ روحانی محافل کا انعقاد

خانقاہ سلسلہ سروری قادری میں ہر سال سلطان العاشقین حضرت سخی سلطان محمد نجیب الرحمن مدظلہ الاقدس کی سرپرستی میں بہت سی روحانی محافل منعقد ہوتی ہیں جن میں ملک بھر سے مریدین، عقیدت مند اور مخلصین شرکت کرتے ہیں۔ اِن محافل میں وسیع اور عالی شان لنگر کا بھی اہتمام ہوتا ہے۔ اِن محافل میں شرکت کرنے والے روحانی فیوض و برکات حاصل کرتے ہیں اور مرشد کامل اکمل کی نگاہِ فیض سے نفس کے عیوب کو دور کرتے ہیں۔ مشاہدات سے معلوم ہوا ہے کہ ا ن محافل میں شرکت کرنے والوں کے ظاہری و باطنی امراض دور ہوتے ہیں اور مشکلات اور مسائل حل ہوتے ہیں۔
سال میں دو بڑی محافل میلاد ِ مصطفی صلی اللہ علیہ وآلہٖ وسلم منعقد ہوتی ہیں جن میں شرکت کرنے والوں کی تعداد سب سے زیادہ ہوتی ہے۔

میلاد ِمصطفی صلی اللہ علیہ وآلہٖ وسلم بسلسلہ جشن عید میلاد النبیؐ

ہر سال ولادتِ مصطفی صلی اللہ علیہ وآلہٖ وسلم جشن عقید ت و احترام اور جوش و خروش سے منایا جاتا ہے۔ ربیع الاوّ ل کا چاند نظر آتے ہی خانقاہ سلسلہ سروری قادری اور سلطان العاشقین ہاؤس کو برقی قمقموں سے سجا دیا جاتا ہے اور 12 – ربیع الا وّل کے دن محفل ِ میلاد کی تیاریاں شروع ہو جاتی ہیں۔
12 – ربیع الاوّل کے دن صبح 11 بجے سلطان العاشقین مدظلہ الاقدس کی زیر ِ صدارت محفل ِ میلاد کا آغاز ہوتا ہے۔ ملک بھر سے ہزاروں عقیدت مند اور محبیّن شامل ہوتے ہیں۔ محفل میں نعت خوانی، آپ صلی اللہ علیہ وآلہٖ وسلم کے کمالات اور درجات کا بیا ن، درودو سلام سے حاضرین اپنے ایمان اور عشق ِ رسول کی حدت کو تازہ کرتے ہیں۔ آخر میں ختم شریف، درود و سلام اور ظہر کی نماز کی ادائیگی کے بعد عالی شان اور وسیع لنگر کا اہتمام ہوتا ہے۔ سلطان العاشقین فرداً فرداً شرکا سے ملاقات فرماتے ہیں اور خوش نصیب طالبانِ مولیٰ کو اسمِ محمد کی نعمت عطا کی جاتی ہے۔
خواتین کی محفل سلطان العاشقین ہاؤس میں منعقد ہوتی ہے۔

میلاد ِمصطفی صلی اللہ علیہ وآلہٖ وسلم بسلسلہ منتقلی امانتِ الٰہیہ

میلاد ِمصطفی صلی اللہ علیہ وآلہٖ وسلم کا ایک عظیم الشان اجتماع ہر سال 21 – مارچ کو منعقد ہوتا ہے جس میں ملک بھر سے عقیدت مند، مریدین اور محبین کثیر تعداد میں شریک ہوتے ہیں۔ -21 مارچ وہ بابرکت دن ہے جب 21 – مارچ 2001ء میں روضہ رسول صلی اللہ علیہ وآلہٖ وسلم پر سلطان العاشقین حضرت سخی سلطان محمد نجیب الرحمن مدظلہ الاقدس کو امانت ِ الٰہیہ منتقل ہوئی تھی اور انہیں سلطان الفقر ششم حضرت سخی سلطان محمد اصغر علی رحمتہ اللہ علیہ کے بعد سلسلہ سروری قادری کا امام منتخب کیا گیا تھا۔
https://urdu.sultan-ul-ashiqeen.com/sultan-ul-ashiqeen-sultan-mohammad-najib-ur-rehman-ko-muntaqili-amanat-e-elahiya-amanat-faqr

اس دن کی یاد میں اس عظیم الشان میلاد ِمصطفٰیؐ کا انعقاد ہوتا ہے اور عالی شان لنگر کا اہتمام کیا جاتا ہے۔ اس دن سلطان العاشقین حضرت سخی سلطان محمد نجیب الرحمن مدظلہ الاقدس ’’اسم ِ محمد ‘‘ کا فیض بھی منتخب طالبانِ مولیٰ کو عطا فرماتے ہیں۔ لوگ آپ مدظلہ الاقدس کی صحبت سے فیض یاب ہوتے ہیں اور آپ کی نگاہ ِ کامل سے صادق دل طالبان تزکیہ نفس کے مراحل سے گزرتے ہیں۔ محفل کے اختتام پر آپ مدظلہ الاقدس تمام شرکاسے فرداً فرداً ملاقات فرماتے ہیں اور اُن کے لیے دعا فرماتے ہیں۔

محفل یادِ حسین ؓ

10 – محرم الحرام کو سید الشہدا حضرت امام حسین رضی اللہ عنہٗ اور شہدائے کربلا کی یاد میں ایک روحانی اور پر وقار محفل منعقد ہوتی ہے جس میں امام ِ عالی مقام رضی اللہ عنہ اور شہدائے کربلا کو خرا جِ عقیدت پیش کیا جاتا ہے اور آخر میں لنگر ِ حسینی تقسیم کیا جاتا ہے۔

عرس سیّد نا غوث الاعظم ؓ

ہر سال ربیع الثانی کے ماہ میں سیّد نا غوث الاعظم حضرت شیخ عبد القادر جیلانی رضی اللہ عنہٗ کا عرس مبارک ہوتا ہے جس میں کثیر لوگ شریک ہوتے ہیں ۔ سیّد نا غوث الاعظم کی شان اور تعلیمات پر بیا ن ہوتے ہیں اور بعد میں لنگر کا اہتمام ہوتا ہے ۔

عرس سلطان باھوؒ

ماہ جمادی الاول میں عرس سلطان باھُو رحمتہ اللہ علیہ کا شاندار اہتما م ہوتا ہے۔سلطان العارفین حضرت سخی سلطان باھُو رحمتہ اللہ علیہ کی حیات و تعلیمات پر بیا ن ہوتا ہے اور کلام ِ باھُوؒ سے لوگوں کے قلوب کو گرمایا جاتا ہے حسب ِ روایت آخر میں لنگر تقسیم ہوتا ہے۔

19 – اگست – یوم ِ ولادت سلطان العاشقین

ہر سال 19 – اگست بعد نما ز ِ مغرب مریدین اور محبیّن سلطان العاشقین حضرت سخی سلطان محمد نجیب الرحمن مدظلہ الاقدس کا یومِ ولادت بڑی محبت اور عقیدت سے مناتے ہیں۔خانقاہ کو خوبصورتی سے سجایا جاتا ہے۔ اس میں ملک بھر سے عقیدت مند اور مریدین شریک ہوتے ہیں۔
مختصر محفل کے بعد لنگر پاک تقسیم کیا جاتا ہے۔

عید ملن تقریبات

ہر سال عید الفطر اور عید الاضحی کے دِن بعد نما ز ِ مغرب سلطان العاشقین حضرت سخی سلطان محمد نجیب الرحمن مدؒظلہ الاقدس مرید ین سے عید ملتے ہیں۔ مختصر سی محفل منعقد ہوتی ہے اور مہمانوں میں لنگر تقسیم کیا جاتا ہے ۔

عرس سیدمحمد عبداللہ شاہ مدنی جیلانی رحمتہ اللہ علیہ
(2012–2016)

آپ ہر سال2012 سے 2016 تک ستمبر- اکتوبر کے مہینہ میں احمد پورشرقیہ میں عرس سلطان التارکین حضرت سخی سلطان سیّد محمد عبداللہ شاہ مدنی جیلانی ؒ بڑی شان و شوکت سے مناتے رہے ہیں۔
سلطان التارکین حضرت سخی سلطان سیّد محمد عبداللہ شاہ مدنی جیلانی رحمتہ اللہ علیہ سلطان العارفین حضرت سخی سلطان باھو رحمتہ اللہ علیہ کے سلسلہ سروری قادری کے امام اور شیخِ کامل ہیں آپ رحمتہ اللہ علیہ کا مزار مبارک احمد پور شرقیہ ضلع بہاولپور میں ہے۔ 
مارچ 2011 میں سلطان العارفین حضرت سخی سلطان باھوؒ نے سلطان العاشقین حضرت سخی سلطان محمد نجیب الرحمن مدظلہ الاقدس کو حکم فرمایا کہ سلطان التارکین حضرت سخی سلطان سیّد محمد عبداللہ شاہ مدنی جیلانی رحمتہ اللہ علیہ کے مزار مبارک کی تعمیر کی جائے اور لنگر جاری کیا جائے۔
اپنی اس ذمہ داری کو نبھانے کے لیے ستمبر2011ء میں سلطان العاشقین حضرت سخی سلطان محمد نجیب الرحمن مدظلہ الاقدس نے پہلی بار حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ کے محل پاک کا دورہ فرمایا اور اس کی خستہ حالی دیکھ کر آپ مدظلہ الاقدس کو بہت دکھ ہوا۔ کیونکہ آپ کا مزار خستہ حال ایک کمرے پر مشتمل تھا اور اس کا ایک ہی خستہ حال مینار تھا باقی تینوں مینار گر چکے تھے۔ مئی2012ء میں آپ مدظلہ الاقدس نے سجادہ نشین شمس الحق کی اجازت سے سلطان التارکین حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ کے محل پاک کی تعمیر دوبارہ شروع کروائی ۔ انہوں نے اس کام کے لیے نور محمد مجاور دربار کو نگران مقرر فرمایا۔مزار مبارک پر سلطان العارفین حضرت سخی سلطان باھُو رحمتہ اللہ علیہ کے مزار مبارک کی طرح چاروں طرف مینار تعمیر کیے گئے اور ان پر رنگ و روغن کا کام کیا گیا اور کاشی کاری والی ٹائلیں لگائی گئیں۔ میناروں کے درمیان میں چاروں طرف گمٹیاں تعمیر کی گئیں اور اُن پر بھی کاشی کاری اور رنگ و روغن کا کام کیا گیا۔ صحن میں بھی ٹائلیں لگائی گئیں۔ تربت مبارک پر سنگِ مرمر لگایا گیا۔ اس طرح مزار مبارک کی تعمیر دوبارہ سلطان العارفین رحمتہ اللہ علیہ کے مزار کی طرز پر 30۔اگست 2012ء کو مکمل ہوئی۔
مزار پاک کی تعمیر مکمل ہو جانے کے بعد سلطان العاشقین حضرت سخی سلطان محمد نجیب الرحمن مدظلہ الاقدس نے2۔ستمبر2012ء کو احمد پور شرقیہ میں مزار مبارک سلطان التارکین حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ پر آپ رحمتہ اللہ علیہ کا شاندار عرس منعقد فرمایا ۔ اس عرس پاک میں حضرت سخی سلطان سیّد محمد عبد اللہ شاہ رحمتہ اللہ علیہ کی شان میں منقبتیں پڑھی گئیں اور ان کی حیات و تعلیمات اور اعلیٰ ترین روحانی مقام پر روشنی ڈالی گئی ۔ حاضرین کو آگاہ کیا گیا کہ سلطان التارکین حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ سلطان العارفین حضرت سخی سلطان باھُو رحمتہ اللہ علیہ کے روحانی وارث اور ان کے بعد سلسلہ سروری قادری کے مرشد کامل ہیں۔ عرس پاک کے اختتام پر سلطان العاشقین حضرت سخی سلطان محمد نجیب الرحمن مدظلہ الاقدس نے حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ کی بارگاہ میں ان کے روحانی فیض کو دوبارہ جاری کرنے کی عرض پیش کی۔ حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ نے، جو سلطان العاشقین حضرت سخی سلطان محمد نجیب الرحمن مدظلہ الاقدس کی تمام تر کاوشوں سے بہت راضی تھے، باطنی طور پر نہ صرف اپنے روحانی فیض کو دوبارہ جاری کرنے کی حامی بھر لی بلکہ یہ بھی فرمایا کہ چونکہ سلطان العاشقین حضرت سخی سلطان محمد نجیب الرحمن مد ظلہ الاقدس نے ہی ان کے روحانی فیض کے احیا کے لیے تمام تر کوششیں فرمائی ہیں اس لیے یہ فیض صرف ان کی ہی جماعت کے لیے مخصوص ہے۔اسی عرس کے دوران فقر کا مرکز شہبازِ عارفاں حضرت سخی سلطان پیر سیّد محمد بہادر علی شاہ رحمتہ اللہ علیہ کے دربار پاک سے بدل کرسلطان التارکین حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ کے دربا ر کی طرف منتقل کر دیا گیا۔ 
اس دور میں فقر کے مرکز کا تبدیل ہونا اس لیے بہت ضروری تھا کیونکہ سلطان العاشقین حضرت سخی سلطان محمد نجیب الرحمن مدظلہ الاقدس کے دور میں نظام کو یکسر بدل دیا جانا تھا ۔گزشتہ ادوار میں فقر کی تبلیغ کا طریقہ بھی مختلف تھا اور مرشد کامل کا اپنے مریدوں کی تربیت کا طریقہ بھی مختلف تھا۔ اس دور میں فقر کو بڑے پیمانے پر پھیلانے کا فیصلہ ہو چکا تھا اور اسی کے لیے نیا نظام وضع کرنے کی ضرورت تھی۔ چونکہ نظام کی تبدیلی ہمیشہ مدینہ سے ہوتی ہے اور حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ مدینہ سے ہی بارگاہِ نبوی صلی اللہ علیہ وآلہٖ وسلم سے مکمل باطنی تربیت لے کر پاکستان (اس وقت ہندوستان) تشریف لائے تھے اس لیے نظام میں تبدیلی کی یہ خصوصیت صرف آپ رحمتہ اللہ علیہ ہی کے پاس تھی۔ وہ وقت بھی آ چکا تھا جس میں سلسلہ سروری قادری سے جعلی اور جھوٹے مشائخ کا خاتمہ ہونا تھا اس لیے مرکز کا مشائخ سروری قادری میں سے اُس شخصیت کے پاس منتقل ہونا ضروری تھا جن سے سلطان العارفین حضرت سخی سلطان باھُو رحمتہ اللہ علیہ کی امانتِ فقر کا دوبارہ اجرا ہو ا تھا۔ لہٰذا بحکم آقائے فقر صلی اللہ علیہ وآلہٖ وسلم اب فقر کا مرکز سلطان التارکین حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ کا مزار پاک بنا دیا گیا۔ 
2012ء کے بعد سے آپ مدظلہ الاقدس ہر سال حضرت سخی سلطان سیّد محمد عبد اللہ شاہ مدنی جیلانی رحمتہ اللہ علیہ کا عرس شاندار طریقے سے مناتے رہے ہیں۔لیکن 14-15 اکتوبر 2017 میں عرس کے تمام انتظامات مکمل ہو چکے تھے کہ سجادہ نشین دربار شمس الحق نے عرس کے قریب اس کے خلاف حکمِ امتناعی (Stay Order) حاصل کر کے عرس کا انعقاد رکوا دیا اور دربار پر قبضہ کا الزام لگایا۔ عرس مبارک کی تاریخ گزرنے کے بعد 24 اکتوبر کو مقدمہ واپس لے لیا مقصد صرف عرس رکوانا تھا۔
سلطان التارکین سیّد محمد عبداللہ شاہ مدنی جیلانی رحمتہ اللہ علیہ اور سلطان الصابرین حضرت سخی سلطان پیر محمد عبدالغفور شاہ رحمتہ اللہ علیہ نے سلطان العاشقین حضرت سخی سلطان محمد نجیب الرحمن مدظلہ الاقدس کو حکم فرمایا کہ آپ خاموش رہیں ان سے اب ہم نمٹیں گے اور فرمایا فقر کا مرکز اب آپ مدظلہ الاقدس کی ذات خود ہے۔